Nagpaandam si Philippine National Police (PNP) chief Police General Jose Melencio Nartatez Jr. nga pasang-atan sang kaso ang bisan sin-o nga mapamatud-an nga nagatago kay Senator Ronald “Bato” Dela Rosa samtang padayon ang pagpangita sang mga otoridad sa senador.
Suno kay Nartatez, nagapadayon ang ila operasyon agud mahibaluan ang lokasyon ni Dela Rosa.
Ginakadtuan kag ginapangusisa man sang mga pulis ang mga tawo nga may malapit nga relasyon ukon posible nga may impormasyon parte sa senador.
Antes sini, ginpahayag ni Interior Secretary Jonvic Remulla nga nagatanyag ang gobyerno sang P50 milyones nga pabuya para sa impormasyon nga magabulig sa madinalag-on nga pagdakop kay Dela Rosa.
Naghatag man ang hepe sang PNP sang isa ka semana nga palugit sa senador agud boluntaryo nga magsungka antes magpatigayon sang mas mabaskog nga operasyon ang mga otoridad para sa iya pagdakop.
Samtang nagapadayon ang pagpangita, ginpaathag sang PNP nga mahimo nga mag-atubang sang legal nga aksyon ang mga tawo nga mapamatud-an nga nagbulig sa pagtago sa senador, suno sa nagakaigo nga mga probisyon sang laye.
