Indi magapadala sang mga representante ang anum ka pungsod sa Southeast Asia para sa ika-75 nga edisyon sang Miss Universe pageant nga natalana nga pagahiwaton sa Puerto Rico.
Ang mga pungsod nga indi magpartisipar amo ang Thailand, Vietnam, Indonesia, Malaysia, Singapore, kag Laos.
Ang desisyon may kaangtanan sa nagaluntad nga indi paghangpanay sa tunga sang mga nagadumala sang pageant kag sa paghatag sang prangkisa sa mga pungsod nga nalakip sa rehiyon.
Ginpahayag nga may indi pag-uyonay sa tunga sang Miss Universe Organization (MUO) kag Miss Universe Eastern, ang rehiyonal nga dibisyon nga ginapangunahan ni Nawat Itsaragrisil, nga amo man ang nagtukod sang Miss Grand International (MGI).
Suno sa report, ginpabutyag ni Raul Rocha sang MUO nga wala sang otorisasyon ang Miss Universe Eastern sa paghatag sang mga prangkisa sa mga pungsod sa Southeast Asia.
Ini nga isyu amo ang isa sa mga rason nga nagresulta sa indi pagpartisipar sang anum ka pungsod sa masunod nga edisyon sang kompetisyon. Sa pihak sini, ginpaathag sang MGI nga ang anum ka kababayen-an nga nagarepresentar sang ila tagsa ka pungsod magapadayon gihapon sa ila mga titulo kag mga responsibilidad.
Bisan indi sila makigbahin sa Miss Universe, padayon gihapon nila nga tumanon ang ila mga katungdanan bilang mga representante sang ila pungsod.
