Magapahamtang ang Philippine National Police (PNP) sang mas hugot nga seguridad sa bug-os nga pungsod paagi sa pagdeployment sang sobra sa 72,000 ka pulis bilang kabahin sang pagpanghanda para sa pagdumdom sang Undas 2026.
Suno kay PCol. Allen Rae Co, hepe sang PNP Public Information Office, magapatuman ang kapulisan sang full alert status halin Oktubre 30 tubtob Nobyembre 2 agud masiguro ang kaluwasan sang mga biyahero nga magapauli sa ila mga probinsya kag sang publiko nga magabisita sa mga sementeryo.
Magalab-ot sa 72,501 ka pulis ang ipangapod sa nagkalain-lain nga lugar sa pungsod, upod ang halos 17,000 ka personnel halin sa Armed Forces of the Philippines, Philippine Coast Guard kag iban pa nga mga ahensya sang gobyerno.
Nagapakig-angot na man ang PNP sa nagkalain-lain nga lokal nga panguluhan agud mapabakod pa ang seguridad kag masiguro ang hapsay nga pagpatigayon sang mga aktibidad sa tion sang Undas.
Paagi sini, ginatuyo sang mga awtoridad nga malikawan ang mga insidente kag masiguro ang hilway kag malinong nga pagdumdom sang mga Pilipino sa ila mga pinalangga nga napatay na.
