Madugay na nga ginpahibalo sa publiko ang plano nga demolisyon sa mga lugar nga ginabaligyaan sang mga manugbaligya, ilabi na sa GenSan Drive kag Alunan Avenue sa Koronadal City. Ini ang ginpahayag ni City Mayor Erlinda “Bing” Pabi-Araquil sa interview sang Bombo Radyo Koronadal.
Suno kay Mayor Araquil, kabahin ini sang programa sang lokal nga panggobyernohan nga pag-ayuhon ang mga dalan kag ihan-ay ang mga puwesto sang mga manugbaligya sa syudad.
Dugang pa sang alkalde, madugay na nga ginaplano ang amo nga tikang agud may tagsa-tagsa nga puwesto ang mga manugbaligya kag mas mangin organisado kag matahum lantawon ang mga lugar nga ginahimo nga sentro sang pagnegosyo.
Lakip man sa ila ginakonsiderar ang paggrupo sang mga manugbaligya suno sa klase sang ila ginabaligya, kaangay sang sistema sa night market, agud mas mangin hapsay ang paghan-ay sang ila mga puwesto.
Ginklaro man ni Mayor Araquil nga wala ginpatuman sing gulpi ang demolisyon, bangod ginhatagan anay sang pahibalo ang mga manugbaligya tuhoy sa plano kag sa mga pagbag-o nga pagahimuon sa ila ginapuy-an nga puwesto.
Samtang, ginpahayag sang alkalde nga may mga alternatibo nga lugar nga mahimo balhinan sang mga apektado nga manugbaligya. Lakip diri ang bahin sang GenSan Drive, sa atubangan sang ginaplano nga Robinsons, ang bahin sang Morales, kag ang night market samtang ginapaayo pa ang ila orihinal nga lugar nga ginabaligyaan.
Sa katapusan, ginpahayag ni Mayor Araquil nga kabahin ini sang mga tikang sang lokal nga panggobyernohan agud mapanami pa ang hitsura sang Koronadal City kag makahatag sang mas maayo nga impresyon sa mga residente kag bisita sang syudad.
