Nagpaandam si Interior Secretary Jonvic Remulla nga posible mag-abot sa 10,000 ang bilang sang mga mapatay kon dayon nga arestuhon si Senador Ronald “Bato” dela Rosa, nga ginmanduan na nga arestuhon sang International Criminal Court (ICC) bangud sa ginapahayag nga pagkabahin niya sa kampanya kontra droga sang anay Presidente Rodrigo Duterte.
Suno kay Remulla sang Martes, amo ini ang rason kon ngaa nagapakig-angot ang gobyerno agud makigsugilanon kag kumbinsihon si Dela Rosa nga boluntaryo nga magsurender sa mga awtoridad.
Ginpahayag niya ini sa mga reporter sa higad sang ika-20 nga ASEAN Ministerial Meeting on Transnational Crime sa Makati City.
Dugang pa ni Remulla, nakabaton siya sang impormasyon duha ka bulan na ang nagligad nga may armadong grupo nga nagaprotektar kuno sa senador. Apang, wala na siya naghatag sang dugang nga detalye tuhoy sa nasambit nga grupo.
Sa karon, wala pa sang dugang nga pagpaathag si Remulla kon paano posible nga mag-abot sa 10,000 ang mga mapatay kon ipatuman ang pag-aresto kay Dela Rosa.
