Ginkasuhan sang Bureau of Internal Revenue (BIR) ang duha ka negosyo bangud sa ginapahayag nga wala pagbayad sang ila buhis nga nagabalor sa kapin P45 milyon para sa taxable years 2017 kag 2018.
Suno sa BIR, ginpasaka nila ang duha ka criminal complaints sa Department of Justice (DOJ) sang Oktubre 14 batok sa Interserve Management & Manpower Resources, Inc. (IMMRI) kag sa mga responsable nga opisyal sini, lakip ang tag-iya sang V.A.T. Coconut Dealer.
Gin-akusahan ang duha sang paglapas sa Section 255 sang National Internal Revenue Code of 1997 bangud sa ginapahayag nga hungod nga wala pagbayad sang ila obligasyon sa buhis.
Base sa imbestigasyon sang BIR, nagabalor sa P33.13 milyon ang wala mabayri nga income tax kag value-added tax sang IMMRI para sa tuig 2017, bisan pa nga gin-audit na ini kag ginpadal-an sang mga demand letter. Samtang, nagadangat naman sa P11.9 milyon ang tax liability sang V.A.T. Coconut Dealer para sa tuig 2018, nga gin-isyu-han na sang warrant of distraint and/or levy sang Marso 6, 2024.
Ginpahayag sang ahensya nga kabahin ini sang ila Run After Tax Evaders (RATE) program. Halin Enero tubtob Setyembre 2026, nakapasaka na ang BIR sang 361 ka RATE cases sa DOJ, nga may kabug-usan nga tax exposure nga nagabalor sa P35.16 bilyon.
Ginpasiguro naman ni BIR Commissioner Charlito Martin R. Mendoza nga bisan ginapadasig sang ahensya ang boluntaryo nga pagtuman sang obligasyon sa buhis, indi sila mag-alang sa pagpasaka sang kaso batok sa mga indibidwal kag negosyo nga hungod nga nagalapas sa layi, agud maprotektahan ang interes sang mga nagatuman sing husto sang ila obligasyon sa gobyerno.
