Magapartisipar liwat para sa isa pa ka world title ang two-time Olympic gold medalist nga si Carlos Yulo matapos makasulod sa apparatus finals sang floor exercise kag vault sa 54th Artistic Gymnastics World Championships sa Rotterdam, Netherlands.
Bisan wala nakasulod si Yulo sa all-around finals matapos magtapos sa ika-34 nga puwesto, padayon gihapon ang iya pagtinguha nga makakuha sang dugang nga world title.
Nagtakop si Yulo sa ikaduha nga puwesto sa floor exercise matapos makakuha sang score nga 14.500, samtang ika-anum naman siya sa vault sa score nga 14.266.
Bangud sini, kwalipikado siya sa finals sang duha ka apparatus.
Upod man sa kompetisyon ang iya manghod nga si Karl Eldrew Yulo, nga nagtapos sa ika-84 nga puwesto sa overall standings.
Nakatalana nga magkompetensya ang magulang nga Yulo sa floor exercise sa masunod nga Sabado, samtang ang finals sang vault pagahiwaton naman sa Domingo.
May yara na sang tatlo ka world championship titles si Carlos Yulo kun sa diin una niya ini nga nakuha sang 2019 sa Germany, ginsundan sang ikaduha sang 2021 sa Japan, kag ang ikatlo sang 2025 sa Indonesia.
Dugang pa sa iya mga kadalag-an, nakakuha man si Yulo sang duha ka bulawan nga medalya sa Asian Games nga ginhiwat sa Japan sang Setyembre, nga dugang nga nagapakita sang iya padayon nga pagpanikasog sa internasyonal nga kompetisyon.
