Nag-upod sa isa ka couples’ retreat ang aktor nga si Baron Geisler kag ang iya asawa nga si Jamie Marie Evangelista, sa tunga sang mga espekulasyon bahin sa problema sa ila pag-asawahay.
Suno sa aktor, indi masami nga mahapos ang pag-asawahay bangud may mga tion sang kalipay kag mga pagtilaw nga nagakinahanglan sang paghangop, pagpasensiya kag pagpasaylo.
Dugang pa niya, dako ang mabulig sang retreat agud makapahuway sila, makapabaskog liwat sang ila relasyon kag mahatagan sang kahigayunan ang pag-ayo sang mga butang nga kinahanglan pa ayuhon.
Nagpangamuyo man si Baron nga padayon nga palig-unon sang Diyos ang ila pag-asawahay kag tudluan sila nga maghigugmaanay nga may pagpaubos kag paghangop.
Samtang, nagpabutyag man sang suporta ang pila ka netizens sa post sang aktor kag nagpahayag sang paglaum nga mag-ayo ang ila relasyon.
Madumduman nga nagluntad ang mga espekulasyon parte sa problema sa ila pag-asawahay sang Setyembre, matapos matalupangdan sang mga netizens nga nag-unfollow sila sa isa kag isa sa social media.
Madumduman nga sang Hulyo, nagkomento man si Jamie sa social media nga kinahanglan magpangayo sang bulig si Baron para sa iya ginapatihan nga problema sa droga.
Sa pihak sini, nagalaum ang ila mga suppporters nga makabulig ang couples’ retreat sa pagkay-o sang ila relasyon kag sa pagpalig-on liwat sang ila relasyon bilang mag-asawa.
