KORONADAL CITY – Ginpaathag ni Board Member Arnold Guerrero, Indigenous Peoples Mandatory Representative (IPMR) sang South Cotabato, ang husto nga pagpatigayon sang tradisyon nga SULIF O SALOM sa tribu Blaan, nga ginahimo bilang pamaagi sa pagresolbar sang mga indi paghangpanay sa sulod sang komunidad.
Sa interview sang Bombo Radyo Koronadal, ginpahayag ni Guerrero nga padayon pa nga ginapatigayon ang amo nga ritwal sa pila ka Indigenous Peoples (IPs), apang amat-amat na nga naganubo ang pagpatigayon sini bangud sa posibilidad nga magresulta sa paglapas sa layi kag pagkadula sang kabuhi.
Suno sa iya, antes magpatigayon sang sulif, ginahimo anay ang dayalogo sa tunga sang duha ka partido sa atubangan sang mga elder kag lider sang komunidad agud masolbar ang indi paghangpanay suno sa customary laws sang tribu.
Apang ginpahanumdom ni Guerrero nga kinahanglan gihapon nga unahon ang kaluwasan sang tanan kag siguruhon nga masunod ang nagakaigo nga proseso, bangud mahimo nga mag-atubang sang criminal liability ang mga nagpatigayon sang amo nga ritwal kon may tawo nga madula ang kabuhi sa proseso.
Dugang pa niya, ang Ginoo lamang ang may katungod sa pagsilot sa mga tawo, gani mas maayo nga maresolbar ang mga away paagi sa malinong nga dayalogo sa bulig sang mga elder kag lider sang tribu.
Madumduman nga nagtuga sa kamatayon sang duha ka indibidwal ang ginpatigayon nga sulif may kaangtanan sa land conflict sa Sarangani Province nga nagalakip sang 15 ka ektarya nga duta.
