Magapanagtag sang P3 bilyon nga fuel subsidy ang gobyerno sini nga bulan para sa ginabulubanta nga 300,000 ka mangunguma, manugpangisda kag truck driver nga nagahatod sang mga produkto agrikultural, bilang kabahin sang UPLIFT program sang gobyerno.
Ini ang ginpahayag sang Malacañang kasunod sang report ni Agriculture Undersecretary Arrey Perez.
Suno sa iya, kabahin ini sang bulig sang gobyerno agod mapagaan ang epekto sang El Niño kag mataas nga presyo sang lana sa sektor sang agrikultura.
Makabaton ang mga mangunguma kag mangingisda sang P5,000 nga one-time fuel subsidy para sa paggamit sang tractors, motorized bancas kag iban pa nga kagamitan nga nagakinahanglan sang gatong.
Samtang, P2,000 kada semana nga fuel subsidy ang mabaton sang mga driver sang delivery truck nga nagahatod sang mga ani halin sa mga uma pakadto sa Metro Manila kag iban pa nga merkado.
Nagapakig-angot subong ang Department of Agriculture sa Land Bank of the Philippines agod mapadasig ang pagpanagtag sang ayuda paagi sa ila mga branch kag ATM.
Ginatuon man sang Toll Regulatory Board kag mga operator sang tollway ang toll holiday ukon discount para sa mga agri-delivery truck tubtob Disyembre 31.
Suno kay Perez, nagalaum ang DA nga makakuha gilayon sang kasugtanan sa mga operator sang tollway agod maimplementar ang toll relief sini nga bulan.
