Ginpasigarbo ni Pangulong Ferdinand Marcos Jr. ang mga investment pledges kag kasugtanan nga nakuha sang Pilipinas sa iya pag-attend sa 33rd APEC Economic Leaders’ Meeting sa Shenzhen, China.
Lakip diri ang P41.1 bilyon nga investment pledges halin sa mga kumpanya nga Tsino nga ginapaabot nga makahimo sang kapin 7,000 ka trabaho para sa mga Pilipino.
Nakuha man sang Pilipinas ang kasugtanan sa kalakalan upod sa Chile, nga ginapaabot nga maghatag sang dugang nga oportunidad para sa lokal nga mga produkto kag serbisyo.
Samtang, ginpabaskog man sang Pangulo ang panawagan para sa mas hilway nga kalakalan, mas masaligan nga supply chain kag pagpalapad sang merkado para sa mga produkto sang Pilipinas.
Ginduso man niya sa mga miyembro sang APEC nga kilalahon ang edukasyon kag propesyonal nga kwalipikasyon sang mga Pilipino agud mapadali ang ila pagpangita sang trabaho sa iban nga pungsod.
Suno kay Marcos, ginapaabot nga ang mga kasugtanan kag pamuhunan nga ini makapabaskog sa lokal nga industriya kag magbukas sang mas madamo nga de-kalidad nga trabaho para sa mga Pilipino.







