Nakaabot sa bag-o nga record-high nga P19.61 trilyon ang kabug-usan nga outstanding debt sang national government sa katapusan sang Agosto 2026.
Suno sa Bureau of the Treasury (BTr), nadugangan sang P217.62 bilyon ukon 1.12 porsyento ang national debt halin sa P19.39 trilyon sang Hulyo.
Ini bangud sa pag-isyu sang mga domestic government securities kag sa pagpaluya sang bili sang piso batok sa dolyar.
Sa kabug-usan nga kantidad sang utang, P13.24 trilyon ukon 67.53 porsyento ang halin sa lokal nga mga ginhalinan, samtang P6.37 trilyon ukon mga US$101.92 bilyon ang halin sa mga foreign sources, base sa exchange rate nga P62.50 kada dolyar.
Buot silingon, nagdako sang 10.72 porsyento ang utang sang Pilipinas kon ikumparar sa P17.71 trilyon nga napagkit sang Disyembre 2025.
Ginapaabot man nga magpadayon pa ang pagtubo sang kabug-usan nga utang sang Pilipinas tubtob 2027 bangud sa plano sang gobyerno nga mangutang sang dugang nga P1.7 trilyon agud pondohan ang ginapaabot nga budget deficit.
