-- ADVERTISEMENT --

Nakakolekta na sang $453.4 milyon ukon sobra ₱28 bilyon ang Bureau of the Treasury (BTr) sa paglunsyar sang ikatlo nga tranche sang Retail Onshore Dollar Bonds (RDB3), bangud sa mataas nga interes sang mga investors.

Ginpahamtang sang Auction Committee ang interest rate ukon coupon sa 5.650 porsyento, matapos maglab-ot sa $839.5 milyon ang total tenders, sobra apat ka beses sang inisyal nga $200 milyon nga offer.

Nagapadayon ang subscription period halin Nobyembre 19 tubtob 24, luwas kun untaton ini sang mas temprano sang BTr.

Ang RDB3 isa ka dollar-denominated government security nga nagatanyag sang quarterly interest payments.

Mahimo mag-invest ang publiko sugod sa minimum nga $200.

Suno kay National Treasurer Sharon Almanza, nagahatag ini sang oportunidad sa mga Pilipino nga mapadakup ang ila dollar savings samtang makabaton sang regular nga kita.

Target sang BTr nga makakolekta sang indi magnubo sa $500 milyon, nga gamiton sa pagpondo sang nagkalain-lain nga programa kag proyekto sang gobyerno para sa pag-uswag sang pungsod.