Ginbasura ni Department of National Defense Secretary Gilberto Teodoro Jr. ang panibag-o nga panawagan sang China nga kuhaon ang BRP Sierra Madre sa Ayungin Shoal, kag ginpabutyag nga wala sang hurisdiksyon ang Beijing sa pagdikta ukon pagpanginlabot sa mga aktibidad sang Pilipinas sa amo nga lugar.
Suno kay Teodoro, ang mga ginahimo sang Pilipinas sa Ayungin Shoal nagabase sa United Nations Convention on the Law of the Sea ukon UNCLOS kag sa international law.
Ini ang iya pahayag matapos liwat nga gin-akusahan sang Chinese Embassy ang Pilipinas nga nagapatigayon sang malapnagon nga pagkay-o kag pagpalig-on sa BRP Sierra Madre agud magtukod sang permanente nga presensya sa Ayungin Shoal.
Samtang, ginpahayag man sang Department of Foreign Affairs ukon DFA nga wala sang kasugtanan ang Pilipinas kag China nga nagamando sa Maynila nga kuhaon ukon i-tow away ang BRP Sierra Madre.
Suno sa DFA, yara ang Ayungin Shoal sa sulod sang Philippine exclusive economic zone kag continental shelf.
Base naman sa 2016 arbitral ruling sa idalom sang UNCLOS, ginakabig ang Ayungin Shoal bilang low-tide elevation nga yara sa sulod sang Philippine exclusive economic zone.
Bangud sini, ginpabutyag ni Teodoro nga wala sang katungod ang China nga magdikta sa Pilipinas parte sa presensya sang BRP Sierra Madre sa amo nga lugar.
