Magadugang sang P300 milyon nga pondo ang administrasyon ni Pangulong Ferdinand Marcos Jr. agud makompleto ang konstruksyon sang Bukidnon Airport sa Don Carlos, Bukidnon pagsapit sang 2027.
Personal nga gin-inspeksyon ni Executive Secretary Ralph Recto ang kasamtangan nga konstruksyon sang paluparan sa Barangay Maraymaray.
Suno kay Recto, tinguhaan sang administrasyon nga matapos ang proyekto agud makahatag sang dugang nga trabaho, makapanghikayat sang investments kag makadani sang mas madamo nga turista sa Bukidnon.
May yara na sang kabug-usan nga P3.17 bilyon nga pondo ang airport, lakip ang P1.36 bilyon nga gin-allocate sa idalom sang administrasyon Marcos. Kon madugang ang ginapanukala nga P300 milyon, magalab-ot sa P1.66 bilyon ang kabug-usan nga pondo nga ginpain sang administrasyon para sa proyekto.
Ang paluparan may yara sang 2,100-metro nga runway nga sarang makabaton sang malalaking commercial aircraft pareho sang Airbus A320. May passenger terminal man ini nga sarang makaserbisyo sang tubtob 425 ka pasahero.
Ginalauman nga mapadasig sang airport ang pagbiyahe sang mga produkto sang Bukidnon, lakip ang pinya, saging, mais, kape, asukal kag livestock, pakadto sa mas dalagko nga mga merkado.
Suno kay Recto, kon mangin mas mahapos ang pagsulod kag pagpagwa sang mga produkto kag tawo sa Bukidnon, mas madamo nga negosyo, trabaho kag oportunidad ang mahimo nga mabuksan sa probinsya.
Nag-upod kay Executive Secretary Recto sa pag-inspeksyon si Senator Juan Miguel Zubiri.
