Nagbukas sa temprano nga tensyon ang ika-21 nga adlaw sang impeachment trial batok kay Vice President Sara Duterte matapos magbanggaan ang House Prosecutor nga si Atty. Benjamin Tolosa Jr. kag defense counsel nga si Atty. Sheila Sison.
Nagsugod ang diskusyon sang ginpamangkot sang prosekusyon si Atty. Michael Poa parte sa iya papel sa pagsabat sa mga audit memorandum sang Commission on Audit ukon COA.
Sa iya pagpamangkot, gingamit ni Tolosa ang pulong nga “abogadong walang alam” sa pagtumod kay Poa kag sa iya pagdumala sang amo nga mga dokumento.
Bangud sini, ginpangayo sang depensa nga kakason sa rekord ang amo nga pahayag, bangud ginakabig ini nga indi angay kag indi matinahuron nga pulong para gamiton sa impeachment proceedings.
Gintawag naman ni Sison ang pahayag nga “rhetoric to provide drama,” nga nagapahangop nga indi ini kinahanglan sa pag-establisar sang mga facts sa kaso kag mahimo lamang maghatag sang wala kinahanglana nga drama sa proceedings.
Sa ulihi, gin-aprubahan sang impeachment court ang mosyon sang depensa kag ginmando nga kakason sa opisyal nga rekord ang amo nga pulong bangod ginakabig ini nga “discourteous” ukon indi matinahuron.
