Padayon nga nagapangatubang ang Pilipinas sa isyu sang mataas nga presyo sang kuryente, nga suno sa World Bank nga isa sa pinakamataas sa Southeast Asia. Ginapakita sang datus halin sa Department of Energy (DOE) nga ang average nga presyo sang kuryente sa pungsod naglab-ot sa P12.43 kada kilowatt-hour (kWh) sang Hunyo—P0.09 kada kWh nga mas mataas sang sa average rate sang Singapore.
Suno sa World Bank, ang mataas nga balayran sa kuryente ang direkta nga naga-apekto indi lamang sa mga panimalay kundi pati man sa mga negosyo. Ang pagtaas sang gasto sa kuryente mahimo magdul-ong sa pagtaas sang presyo sang pagkaon, transportasyon, kag iban pa nga mga serbisyo. Ginhatagan punto man sang World Bank nga ang mataas nga gasto sa enerhiya mahimo nga makaguba sang ikasarang sang Pilipinas sa pag-ganyat sang bag-o nga mga investors kag makatuga sang madamo nga mga trabaho nga may maayo nga sweldo.
Ang mga kabangdanan nga nakilala nga nagaamot sa mataas nga presyo sang kuryente nagalakip sang daku nga power generation, daan na nga mga power supply agreement, mga isyu sa transmission system, emergency power purchases, kag limitado nga kompetisyon sa sulod sang power generation sector.
Bilang sabat, ang World Bank nagrekomendar sang pagpasangkad sang renewable energy, pagmoderno sang transmission grid, kag pagpasanyog sang mas daku nga kompetisyon sa sektor sang kuryente. Ini nga mga tikang mahimo nga makapanubo sang gasto sa kuryente, makapadasig sang sektor sang manufacturing, makatuga sang dugang nga mga trabaho, kag makabulig sa pagpanubo sang kaimulon sa pungsod.
