Hinatulan sang Sandiganbayan nga guilty si Janet Lim Napoles sa 10 ka kaso sang graft kag 10 ka kaso sang malversation of public funds through falsification of public documents, may kaangtanan sa ginapatihan nga maanomalyang paggamit sang pondo sang gobyerno.
Sa desisyon sang anti-graft court, ginpatawan si Napoles sang prisyon nga tubtob 15 ka tuig sa tagsa ka kaso sang graft, kag 17 ka tuig kag apat ka bulan tubtob 20 ka tuig sa tagsa ka kaso sang malversation.
Naghalin ang kaso sa ginapatihan nga maanomalyang pagkuha sang P50 milyon nga pondo pinaagi sa 10 ka non-government organizations (NGOs), nga gin-agi sa 10 ka local government units (LGUs) para kuntani sa farm inputs nga pondohan sang Department of Agrarian Reform (DAR).
Sa imbestigasyon, naguwa nga wala sang rekord ang mga LGU sang nasambit nga proyekto kag wala man sila nakapangayo sang pondo para sini.
Lakip man sa nahatulan si anay Department of Agrarian Reform Undersecretary Jerry Pacturan, nga ginpahayag nga guilty sa 10 ka kaso sang malversation. Samtang si Evelyn de Leon naman ang nahatulan sang tig-tatlo ka kaso sang graft kag malversation.
Ang bag-o nga desisyon nagadugang sa mga kaso nga una na nga ginpamatukan ni Napoles, nga ginakabig nga sentral nga personalidad sa kontrobersyal nga pork barrel scam.
