Ginbasura na sang Office of the Ombudsman ang kaso nga ginsaka batok kay Department of Public Works and Highways (DPWH) Secretary Vince Dizon may kaangtanan sa konstruksyon sang mga pasilidad para sa 2019 Southeast Asian (SEA) Games bangud sang kakulangan sang ebidensiya.
Suno kay Assistant Ombudsman Mico Clavano, nakasaad sa joint resolution nga ginpaguwa sang Disyembre 2021 nga wala sang igo nga ebidensiya agud mapasakaan sang kaso si Dizon.
Nagguwa ang pahayag kasunod sang anunsyo ni National Bureau of Investigation (NBI) Director Melvin Matibag nga ginaiimbestigahan sang ahensya ang ginapatihan nga bidding kag funding anomalies sa mga proyekto sang 2019 SEA Games, ilabi na sa New Clark City Sports Complex, bangud sang bag-o nga impormasyon.
Apang suno kay Palace Press Secretary Claire Castro, naimbestigaran na anay si Dizon kag ginbasura na ini.
Samtang, ginpahayag sang Department of Justice (DOJ) nga ginatamod nila ang operational independence sang NBI sa pagpadayon sang imbestigasyon.
