Ginpahayag ni Senator-Judge Panfilo Lacson nga indi dapat isikway sang impeachment court ang nagapadayon nga mga layi sa pagtalakay sang hingyo nga mabuksan ang tax records ni Vice President Sara Duterte.
Suno kay Lacson, kinahanglan sundon sang impeachment court ang mga ginapatuman sang National Internal Revenue Code, lakip na ang pagkuha sang nakasulat nga awtorisasyon halin sa Presidente antes mabuksan ang selyado nga “green box” sang Bureau of Internal Revenue (BIR) nga nagalakip sang tax records sang bise presidente.
Ginpaathag ni Lacson nga ang iya panindugan nakabase sa Rule of Law kag indi ini nagakahulugan sang pagsuporta sa bisan diin nga kampo sa impeachment trial.
Dugang niya, indi dapat mangin basehan ang bisan ano nga posible nga interpretasyon politikal sa desisyon sang Presidente kon maghatag ini sang written authority, bangud ang importante amo ang pagsunod sa ginapatuman sang balaod.
Ginalauman nga pagatalakayon sang impeachment court sini nga semana ang oral arguments parte sa mga subpoena para sa mga rekord sang Bureau of Internal Revenue, Anti-Money Laundering Council, kag mga bangko.
