Gin-arestar ang NBA star nga si James Harden bangud sang ginapahayag nga pagbitbit sang wala lisensya nga armas samtang yara ini sa Texas.
Suno sa mga otoridad, nakuhaan si Harden sang isa ka armas sa sulod sang iya salakyan sa tion sang ila inspeksyon.
Bangud sini, gindala siya sa kustodiya agud imbestigahan kag matalakay ang posible nga mga kaso nga may kaangtanan sa insidente.
Sa karon, nakaguwa na siya matapos makapagpiyansa.
Gintalana ang iya pag-atubang sa korte sa masunod nga Hunyo 22, sa diin pagahisgutan ang mga kaso nga ginpasaka batok sa iya kag ang masunod nga mga tikang sa legal nga proseso.
Isa si Harden sa kilala nga basketball player sa National Basketball Association.
Nagsugod ang iya propesyonal nga karera sa liga sang 2009 kag nakadula na siya para sa nagkalainlain nga mga koponan pareho sang Oklahoma City Thunder, Houston Rockets, Brooklyn Nets, Philadelphia 76ers, kag Los Angeles Clippers.
Kilala siya bilang isa sa mga pinakamabaskog nga scorer sa NBA kag nangin importante nga bahin sang tagsa ka koponan nga iya ginhampangan.
