Nagalokar ang gobyerno sang masobra ₱1.30 trilyon para sa pagpauswag sang sektor sang edukasyon sini nga tuig.
Ginpahayag ini ni President Ferdinand Marcos Jr. sa iya speech sa ika-3rd Commencement Exercises sang West Visayas State University College of Law, kun sa diin ginpabutyag niya nga importante ang padayon nga pagpamuhunan sa edukasyon agud mas mapabakod ang sistema sang hustisya kag mapauswag ang pungsod.
Kadungan sang okasyon, ginpangunahan man sang Presidente upod kay First Lady Louise Araneta-Marcos ang inagurasyon sang bag-o nga apat ka floor nga building sang WVSU College of Law nga may anum ka classroom, review room, kag duha ka moot court.
Una na nga ginreport sang Presidente nga ang nasyonal nga budget para sa 2026 nagalokar sang pinakadako nga pondo para sa edukasyon sa maragtas sang Pilipinas nga nagaabot sa ₱1.345 trilyon ukon 4.36 porsiyento sang Gross Domestic Product (GDP).
Pagausaron ang amo nga pondo para sa pagkuha sang dugang nga mga maestro, learning recovery programs sa mga panguna nga asignatura, school-based feeding programs, kag sa pagtukod sang dugang nga mga hulot-klasehan sa bug-os nga pungsod.
