Nagpaguwa sang bag-o nga pagsulundan ang Registry sang International Criminal Court (ICC) angot sa nakatalana nga trial kay anay Presidente Rodrigo Duterte, nga nagapangatubang sa kaso nga crimes against humanity may kaangtanan sa kampanya batok sa ilegal nga droga.
Lakip sa mga rekomendasyon sang ICC Registry ang pagmando sa mga partido kag lakip sa kaso nga klaro nga tukibon ang mga kabahin sang transcript nga luyag nila nga ipa-redact ukon itago sa publiko.
Ginrekomendar man sang Registry ang pagusar sang transcript verification process nga ginusar sa kaso ni Mahamat Said Abdel Kani agud masiguro ang accuracy sang mga official record sang hearing.
Luwas sini, ginawhag sang Registry ang Trial Chamber III nga usaron ang witness-entity kag evidentiary-materials ukon E-binders modules sa Judicial Workflow Platform.
Madumduman sa una nga status conference sang Mayo 27, ginpahayag ni Trial Chamber III Presiding Judge Joanna Korner nga magapatigayon ang korte sang panibag-o nga inspeksyon sa ikaayong lawas ni Former President Rodrigo Roa Duterte agud matumod kun may ikasarang ini nga magatubang sa hearing.
Nakatalana nga magaumpisa ang hearing ni Duterte sa Nobyembre 30, 2026, samtang magapatigayon man sang duha pa ka status conferences ang ICC sa Hunyo 23 kag Hulyo 14 bilang kabahin sang preparasyon para sa palaabuton nga trial.
