Ginaalegar nga madamo nga pulis ang nagahandum nga mag-istorya bahin sa ila mga eksperyensya sa madug-on nga drug war sang tion ni anay Presidente Rodrigo Duterte, suno sa bag-o nga natukod nga EJK Truth Commission.
Pahayag ni EJK Truth Commission Executive Director Carlos Conde, antes pa matukod ang independent body may mga pulis na nga nagpakita sang preparasyon kag handum nga makapag-istorya bahin sa ila malala nga eksperyensya.
Indi man suno pa malikawan nga sang una na lang ginasunod sang mga pulis ang mando sang national headquarters bisan pa kun ini kontra sa ila kabubut-on.
Wala man sila sang kahigayunan nga magpahayag ukon magreklamo batok sa sistema kag organisasyon nga ila ginakabilogan, bangud sa istrikto nga ‘chain of command’.
Suno kay Conde, ang Truth Commission nagahandum nga mangin lugar ini agud mapakigbahin sang mga pulis ang ila mga eksperyensya kag trauma sa madug-on nga operasyon, kag ang epekto sini sa ila pagkatawo.
Gusto man sang grupo nga maintindihan kun ano ang ginahunahuna sang mga pulis sang ginahimo nila ang mga operasyon nga nagresulta sa libo-libo nga kamatayon.
Amo ini ang rason suno sa iya nga may mga eksperto nga kaupod sa grupo.
Nagpromisa man ang grupo nga maproteheran ang identidad sang mga pulis kag indi ini makaapekto sa ila padayon nga serbisyo.
Tanan sini, suno kay Conde, igadokumento sang EJK Truth Commission, kaupod ang testimonya kag istorya sang mga biktima sang madug-on nga kampanya batok iligal nga droga.
