Nag-uswag ang career sang taga-South Korea nga Filipina singer nga si Gwyn Dorado pagkatapos niya ginhimo ang Original Sountrack para sa popular nga K-drama nga “My Royal Nemesis.”
Si Gwyn ang nangin bantog sa edad nga 10 anyos matapos nga nag-upod sa Asia’s Got Talent sa diin nakasulod siya sa grand finals kag natapos bilang isa sa Top 5 finalists, kaupod ang iban pa nga Filipino acts kaangay sang El Gamma Penumbra kag soprano nga si Gerphil Flores.
Sang 2016, ginkanta man niya ang Philippine National Anthem sa katapusan nga State of the Nation Address ni nagtaliwan nga anay Presidente Noynoy Aquino.
Samtang nagauswag ang iya karera, nagpirma sia sang lima ka tuig nga kontrata sa ahensya sang South Korea nga A.O Entertainment sang Pebrero 2024, nga nagbukas sang dalan para sa iya pagsulod sa industriya sang K-music.
Halin sini, ginpaguwa niya ang kanta nga “What If,” nga nangin opisyal nga soundtrack para sa K-drama nga “ToGetHer,” kag ginsundan ini sang digital single nga “Way,” nga nagamarka sang iya opisyal nga debut sa South Korea.
Bangud sini, liwat nga ginpakita ni Gwyn ang iya talento pagkatapos nga nag-upod sa South Korean singing competition nga Sing Again, isa ka programa nga nagahatag sang bag-o nga oportunidad sa mga “nalipatan” ukon underrated nga mga manugkanta.
Sa nasambit nga palagwaon, nagsaka ang pagkapopular ni Gwyn pagkatapos nga gin-islan ang iya screen name sa “Dorado” nga ginkuha sa iya apelyido.
Nakalab-ot ang Filipina singer sa grand finals sang kompetisyon kag nakabaton sang ikaduha nga pinakamataas nga numero sang boto, magluwas nga nakabaton sang pagdayaw gikan sa mga hurado nga indi makapati sa iya ikasarang sa pagkanta kag paghambal sang Koreano.
