Nagsaka sang halos 15 porsyento ang koleksyon sang Bureau of Customs (BOC) halin sa Fuel Marking Program (FMP) sa una nga apat ka bulan sang tuig, nga nakaabot sa P93.11 bilyon halin sa duties kag excise taxes.
Sandig sa datos, masobra 7 bilyon ka litro sang fuel ang na-markahan halin Enero tubtob Abril, mas mataas kumpara sa amo man nga period sang nagligad nga tuig.
Ginasiling sang BOC nga ang pagsaka sang koleksyon resulta sang mas hugot nga monitoring sa oil imports kag kampanya batok smuggling sa tunga sang krisis sa enerhiya.
Pinakadako nga bahin sang marked fuel naghalin sa diesel, samtang pila naman ka mga fuel company ang nagpanguna sa volume sang na-markahan nga fuel products.
Samtang, nadakpan man sang mga otoridad ang duha ka barko nga ginapatihan may dala nga wala na-markahan nga diesel, lakip na ang MT Coral Song sa Villanueva.
Sa pihak sang tensyon sa Middle East kag pagsaka sang presyo sang petrolyo, ginmandu sang BOC ang tanan nga pantalan nga padasigon ang pagproseso sang fuel imports kag hugtan pa ang monitoring operations.
