Pormal nga gin-eleher bilang bag-o nga Presidente sang Senado si Sen. Alan Peter Cayetano sa ginhiwat nga botohan sa plenary session sang Senado kahapon nga adlaw, Lunes, Mayo 11.
Sa kabug-usan nga 24 ka senador nga nagtambong sa sesyon, nakabaton si Sen. Cayetano sang 13 ka boto, nga igo agud mapirde si Sen. Tito Sotto nga nakakuha sang 9 ka boto.
Lakip sa nagboto pabor kay Sen. Cayetano, luwas sa siyam niya ka kaupdanan sa Minority bloc, amo ang iya manghud nga si Sen. Pia Cayetano kag ang mag-utod nga sanday Camille Villar kag Mark Villar.
Ang siyam naman ka senador nga nagboto kay Sen. Sotto amo sanday Sen. Bam Aquino, Sen. Win Gatchalian, Sen. Risa Hontiveros, Sen. Panfilo “Ping” Lacson, Sen. Lito Lapid, Sen. Kiko Pangilinan, Sen. Raffy Tulfo, Sen. Erwin Tulfo kag si Sen. Tito Sotto.
Duha naman ka senador ang nagpili nga mag-abstain, lakip sanday Sen. JV Ejercito kag Sen. Juan Miguel Zubiri.
Ikaapat na nga lider sang Senado si Cayetano nga yara sa idalom sang administrasyon ni President Ferdinand “Bongbong” Marcos Jr.
Madumduman nga una nga nagserbi bilang Senate President si Sen. Zubiri sa pagsugod sang administrasyon, nga ginsundan ni Sen. Chiz Escudero sang 2024, kag ni Sen. Tito Sotto sang 2025.
Natabo ang balasahan sa tunga sang mainit nga isyu bahin sa Articles of Impeachment batok kay VP Sara Duterte.
Ginapaabot nga magaabot ang reklamo sa Senado para sa isa ka pormal nga impeachment trial kun makabaton ini sang kinahanglanon nga 1/3 nga boto halin sa House of Representatives.
