Temporaryo ginpasuspinde sang Energy Regulatory Commission (ERC) ang pagkolekta sang Green Energy Auction Allowance (GEA-All) sa mga electric bill para sa Mayo kag Hunyo 2026.
Ang GEA-All amo ang dugang nga sukot nga ginagamit agud pondohan ang renewable energy projects pareho sang solar, wind kag hydro projects sa pungsod.
Suno sa ERC, ang tikang may tinutuyo nga mabuligan ang mga konsumidor nga mamenusan ang gasto sa kuryente sa tunga sang pagsaka sang presyo sang mga balaklon kag global economic pressures.
Ginpahayag man sang ahensya nga may yara pa sang sapat nga pondo ang GEA-All nga nagaabot sa mga P466.49 million agud mabayaran ang obligasyon sa renewable energy developers apisar may suspensyon sa koleksyon.
Suno kay ERC Chairperson Atty. Francis Saturnino Juan, makabulig ini agud mabuhinan ang kabug-at sang bayranan sa kuryente samtang padayon man nga ginasuportaran ang pagbalhin sang pungsod padul-ong sa malimpyo nga enerhiya.
Pagarepasuhon liwat sang ERC sa Hunyo kon mahimo pa mapalawig ang suspensyon base sa kahimtangan sang ila pondo.
