Nagpahayag ang isa ka OFW sa Kuwait nga mas mabatyagan na subong ang kalinong kag kahilwayan sang sitwasyon sang mga OFW bangud wala na sang mga airstrikes sa ila lugar.
Sa interview sang Bombo Radyo Koronadal kay si Rosel Fajartin Samam, iya ginpahayag nga pila na ka adlaw ang nagligad halin sang ulihi nga nakabaton sila sang warning alert sa ila mga cellphone, bangud nag-untat na ang asod-asod nga airstrikes.
Ginpasalamatan man niya ang ginpatuman nga ceasefire sa rehiyon, bangud maayo kag wala na sang kahadlok kun san-o kag diin magtupa ukon maigo ang mga missile.
Apisar sini, ginpahayag ni Samam nga wala pa siya sang plano nga magpauli sa Pilipinas, bangud para sa iya mas mabudlay gihapon ang sitwasyon sa pungsod ilabi na ang pinansyal nga aspeto kumpara sa kahimtangan sang Middle East.
Sa pihak sini, nagalaum gihapon siya nga magapadayon na ang kalinong sa Middle East agud mangin hilway na sila nga makapauli sa pungsod kun matapos na ila kontrata sa masunod nga tuig.
