Nagpaabot sang pagpasalamat si President Ferdinand Marcos Jr. kay Eduardo Año bangud sa iya serbisyo sa pagduso sang counterterrorism kag internal security measures sang pungsod, suno kay Palace Press Officer Usec. Atty. Claire Castro.
Ginkumpirmar man nga ginbaton sang Presidente ang pagbakante ni Año, kag pagatal-usan ni Eduardo Oban Jr., nga may malapad nga eksperyensya sa military operations kag national security.
Nagasalig man ang Presidente nga makahatag si Oban sang mabakod nga liderato agud mapadayon ang mga prayoridad sa nasyonal nga seguridad.
Sa pihak nga bahin, gin-anunsyar ni Año ang iya permanente nga pagretiro bilang National Security Adviser kag Director General sang National Security Council, epektibo Abril 16, 2026.
Suno sa iya, tion na agud ipasa sa iban ang responsibilidad kag tutukan ang iya kahimsugan matapos ang madugay nga pagserbisyo sa gobyerno, lakip ang iya mga katungdanan bilang hepe sang Philippine Army, AFP Chief of Staff, kag DILG Secretary.
Ginpasiguro ni Año nga magapadayon ang mga kritikal nga operasyon kag inisyatibo sang ahensya sa idalom sang bag-o nga liderato, kag nagpasalamat siya sa pagsalig nga ginhatag sa iya sang Pangulo.
