Gin-athag ni France President Emmanuel Macron nga indi gid magbulig ang ila pungsod sa pag-secure sa Strait of Hormuz sa subong nga konteksto sang inaway.
Ini ang isa ka pagpamalibad sa panawagan ni US President Donald Trump sa ila mga kaalyado nga magbulig sa pag-escort sang mga barko nga magaagi sa nasambit nga kadagatan.
Sa iya paghambal sa defence council meeting, ginpahayag ni Macron nga makabulig man ang France sa amo nga katuyuan apang pagkatapos na nga magkalma ang sitwasyon.
Nahibaluan nga ang Strait of Hormuz isa ka strategic waterway sa diin nagaagi ang ginabanta 20 percent sang global seaborne oil.
Sang nagligad nga semana, ginpahayag ni Macron nga nagapreparar na ang France kag mga kaalyado sini para sa isa ka “defensive” mission nga liwat nga buksan ang Strait of Hormuz nga epektibo nga ginsirado sang Iran bilang balos sa gyera nga ginlunsyar sang United States kag sang Israel sang February 28.
Apang gin-athag sang French president nga mangin posible lang ang amo nga operasyon matapos nga magtahaw na ang pinakamainit nga bahin sang gyera.
Sang Martes, March 17, ginlaslasan ni US President Donald Trump ang NATO angut sa away sa Iran, kag ginsiling nga indi kinahanglan sang United States sang bulig.
Suno kay Trump, kalabanan sa mga kaalyado sang US ang nagpamalibad sa iya ginaduso nga pag-escort sang mga barko sa Strait of Hormuz.
Nagdistansya man ang Japan, Australia, Poland, Spain, Greece kag Sweden sa military involvement sa natumod nga kadagatan.
Padayon naman nga nagasaka ang presyo sang gatong sa bug-os nga kalibutan humalin sang nagsugod ang Iran sa pag-atake sang mga barko sa natumod nga alagyan kag naglunsyar sang madamo nga missile kag drone strikes sa palibot sang Gulf.
