Gina-verify na sa karon sang YBL Inc. ang identidad sang konduktor nga ginreklamo sang isa ka estudyante bangud nga wala niya gin-discount ang pamasahe bisan nagpakita sang valid nga student ID.
Ini ang nangin pahayag ni Bernard Bolanio, Operations Manager, Yellow Bus Line, Inc., sa interview sang Bombo Radyo Koronadal.
Suno kay Bolanio, padayon ang pagtukib sang kumpanya sa insidente agud masiguro nga ang tanan nga konduktor nagasunod sa mandato sang Land Transportation Franchising and Regulatory Board (LTFRB) nga nagapahanumdom nga obligasyon ang paghatag sang student discount sa tanan nga estudyante, bisan may klase ukon wala sa adlaw sang biyahe.
Bangud sini, ginapanawagan man sang kumpanya sa publiko, labi na sa mga pasahero, nga gilayon ireport ang mga kasubong nga insidente sa ila talatapan agud ini gilayon matutukan kag maaksyunan.
