Indi na bag-o sa Oman ang paghiwat sang beauty contest sang mga Camel tagsa ka tuig.
Apang kasubong sang beauty contest sang tawo, nagaluntad man ang kontrobersiya sa beauty pageant sang mga Camel ilabi na nga ang tanan gusto magdaug sa amo nga paindis-indis ilabi na ang mga tag-iya sang mga ini.
Sa kagustuhan nga magdaug sa Camel Beauty contest, may mga tag-iya sang Camel nga ginapa-enhance ang ila pambato.
Kag sining karon lang, naglab-ot na sa punto nga ginapaidalum na nila sa surgery kasubong sang Botox fillers kag plastic surgery ang mga Camel agud labi nga magtahum kag daku ang tsansa nga magdaug.
Apang sining karon lang sa 2026 Camel Beauty Show Festival sa Al Musanaa, Oman, 20 ka mga Camel ang ginpang-disqualify matapos matukiban nga indi na natural ang itsura.
Natukiban ini sa tion sang inspection sa mga Camel kon sa diin ang mga ini ang ginpaidalum sa botox kag lip fillers, silicone reshaping kag artificial hump inflation.
