KORONADAL CITY – Nagapadayon ang imbestigasyon sang mga otoridad sa nasapwan nga bangkay sang duha ka indibidwal sa boundary sang Barangay Nalapaan kag Barangay Panicupan sa Pikit, Cotabato nga ginapatihan biktima sang summary execution.
Suno sa una nga nakakita sang mga bangkay, nasapwan ang mga ini nga nakagapos ang mga kamot sa likod kag may higot subong man madamo sang igo sang bala sa nagkalain-lain nga bahin sang ila nga lawas.
Sa karon, ginahibalo pa ang identity sang mga biktima kag kun taga diin ang mga ini.
Suno naman sa mga barangay officials, posible nga ginkidnap ang mga biktima kag ginhaboy lamang sa nasambit nga lugar.
Sa karon, nagapakig-angot na ang mga otoridad sa Police Regional Office-Bangsamoro Autonomous Region kag Cotabato Provincial Police Office agud nga makilala ang mga biktima kag mahibaluan ang motibo sang krimen.
