Pormal nga nagpasaka sang reklamo nga cyber libel si Senadora Risa Hontiveros sa NBI batok sa mga tawo nga yara sa likod sang duha ka video ni Michael Maurillo, nga kilala man bilang “Rene,” nga ginpahayag niya nga “dangerous lies.”
Upod ang iya legal team, nagtambong siya sa NBI sang Hulyo 2 agud imbestigaran kon sin-o ang naghimo sang video kag mga vlogger nga nagpalapnag sang peke nga impormasyon sa social media.
Sa mga video nga gin-upload sa YouTube kag Facebook, ginpahayag ni Maurillo nga ginbayaran siya sang P1 milyon agud magpamatuod batok kanday Pastor Apollo Quiboloy, anay Presidente Rodrigo Duterte, kag Bise Presidente Sara Duterte sa Senate hearing nga ginpanguluhan ni Hontiveros.
Gintudlo sang senadora ang pila ka social media personalities nga nagbahin sang video bisan wala gin-usisa ang kamatuoran, upod kanday Trixie Cruz-Angeles, Sass Sasot, Jay Sonza, kag iban pa.
Nagpresentar ang iya legal team sang ebidensya pareho sang screenshots kag links, kag nangayo man nga mahibaluan kon diin si Maurillo subong kag sin-o ang naga-operate sang isa ka social media page nga “Pagtanggol Valiente.”
