Tatlo ka miyembro sang New People’s Army (NPA) ang napatay, lakip ang duha ka ginapatihan nga mataas nga lider, matapos ang isa ka armadong engkwentro sa tunga sang mga rebelde kag tropa sang 37th Infantry Battalion (37IB) sang Philippine Army sa Barangay Datu Ito Andong, Kalamansig, Sultan Kudarat sang Hunyo 19, 2025.
Suno sa report sang militar, madalom nga kaagahon nagsugod ang engkwentro kag naglawig sang duha ka oras.
Nakuha sa lugar ang pila ka high-powered nga armas kag mga Improvised Explosive Devices (IEDs) nga ginbilin sang mga rebelde.
Ginpasiguro man sang 37IB nga isa sa ila nga kasundaluhan ang napatay sa nasambit nga engkwentro.
Sa karon, padayon ang pursuit operations batok sa mga natikal nga miyembro sang CTG nga nagpalagyo sa engkwentro.
Suno pa kay 37IB, duha sa tatlo nga napatay ginapatihan nga may mataas nga ranggo sa grupo, apang padayon pa ang imbestigasyon kag validation agud makilala sang husto ang mga bangkay.
Nagapadayon man ang clearing operation sa lugar agud masiguro nga luwas ini sa mga risgo para sa mga pumuluyo. Ginapangabay sang militar ang bulig sang komunidad sa pagreport sang mga kahina-hinala nga aktibidad nga makabulig sa mas madasig nga pagresolbar sang insidente.
