Aminado ang Department of Agriculture nga maga-abot pa sang duha tubtob tatlo ka tuig antes gid nga makabalik sa normal ang lokal nga populasyon sang baboy sa pungsod.
Suno sa ahensya, ini bangod sang epekto sang African Swine Fever (ASF) kag ginahambal nga kinahanglan pa nga makaabot liwat sa pre-ASF nga lebel.
Sa isa ka pahayag, ginpahayag ni DA spokesperson Assistant Secretary Arnel de Mesa nga may nakita na sila nga mga senyales nga makabawi na liwat ang lokal nga industriya sang baboy.
Padayon man ang ginahimo sang ahensya nga pagbakuna sa mga baboy kag nagapakita man ini sang maayo nga resulta.
Ginahulat man sang ahensya ang pag-aproba sang FDA para sa clearance nga mabaligya na ang ASF vaccine commercially.
Base sa datos sang ahensya, halin sang una nga outbreak sang ASF sang tuig 2019, nagbuhin ang national hog inventory halin sa 13 milyones nga baboy pakadto sa siyam ka milyones.
