Ginkontra sang Philippine Navy ang akusasyon sang China nga ilegal kuno nga nagsulod sa Scarborough Shoal ang corvette nga BRP Apolinario Mabini, nga ginpahayag sang Chinese Southern Theatre Navy bilang “seryoso nag paglapas” sa ila soberanya kag sa ila ginakabig nga mga balaud.
Suno sa pahayag sang Philippine Navy sang Lunes, Abril 21, may lehitimo nga awtoridad ang mga barko nga may bandila sang Pilipinas nga mag-challenge ukon magresponde sa presensya sang bisan ano nga barko sulod sa teritoryo sang West Philippine Sea.
Ginpaathag ni Rear Admiral Roy Vincent Trinidad, Navy spokesperson para sa West Philippine Sea, nga ang pag-akusar sang China isa ka bahin sang ila propaganda para lang sa ila internal audience.
Ginbuyagyag sang China nga ila ginmonitor kag ginpapa-guwa ang nasambit nga barko sang Pilipinas sa ila ginakabig nga teritory apang ginpanindugan sang Philippine Navy nga ang operasyon sang BRP Apolinario Mabini sakop sang maritime zones sang Pilipinas kag wala naglapas sa bisan ano nga international agreement.
Ginpasiguro man sang AFP nga magapadayon ang patrolya kag presensya sang Pilipinas sa Scarborough Shoal kag iban pa nga bahin sang West Philippine Sea bilang kabahin sang pagpanalipod sa soberanya kag teritoryo sang pungsod.
