Magahulam ang Marcos administration sang kabug-usan nga $6.35 billion ukon kapin P369.66 bilyones halin sa Asian Development Bank (ADB) kag World Bank agud nga may pondo ang mga proyekto.
Ini para malab-ot ang mga tuyo para sa development sang nasyon.
Magatutok ang ini nga mga inisyaribo sa pagpauswag sa urban transit, pag-promote sang climate-resilient agriculture, pagpasangkad pa sang malimpyo nga enerhiya, pagpaayo pa sang sanitation, pagpabaskog sang health and education services, kag pag-upgrade sang rural infrastructure.
Ginaalegar nga pito ka concessional financing packages ang magahalin sa ADB kag siyam naman ang i- loan sa World Bank apang naka-schedule pa ini nga aprubahan subong nga tuig.
Una na nga ginpahayag ni Department of Finance Secretary Ralph Recto nga nagaplano ang national government nga buhinan ang foreign borrowings sa 10 porsyento sa medium term nga magahimo sang domestic borrowings sa 90 percent.
Suno kay Recto ,ini nga propasal ang naga-target sang gradual shift sa 90 percent domestic borrowing agud nga mabuhinan ang mga risgo angut sa foreign exchange pagkatapos sang 2028.
Sang nagligad nga tuig, naka-secure ang DOF sang 12 ka financing deals kag nakahulam sang kabug-usan nga $5.67 billion (P333.42 billion) agud mapondohan ang mga proyekto sa infrastructure, transport, defense, digital technology, health, kag agriculture.
