Nagdangat sa kabug-ason nga 638 ang bilang sang mga aksidente sa dalanon sang holiday season matapos madugangan pa sang 32 nga bag-o nga mga kaso subong nga adlaw sang Sabado, Enero 4, 2025.
Nagsaka ini sang 30% halin sa natala sang Road Traffic Incidents sang 2023.
Sa datos sang Department of Health (DOH), halin sa kabug-ason nga kaso, kadam-an diri ukon 553 sa mga naaksidente ang wala nagagamit sang safety gears patas sang helmet kag seatbelt, ikaduha nga rason sang aksidente amo ang sa motorcycle accidents nga yara sa 452 cases samtang 117 ang naaksidente nga yara sa impluwensya sang makahulubog nga ilimnon.
Nagapabilin man nga 7 ang natala sang DOH nga napatay kung sa diin 4 diri ang motorcycle accident.
Bangod sini liwat nga nagpahinumdom ang ahensya sa karon nga weekend nga indi magbyahe nga nakainom, magsuksok sang safety gears kag sundon ang laye sang dalanon.
