Ginapasiguro sang kapulisan ang pagbantay sa sementeryo, simbahan, merkado publiko, mga establisyemento komersiyal kag terminal ukon mga matawo nga lugar subong nga UNDAS.
Ini ang ginpasiguro ni PLt.Col. Hoover Antonio sa interview sang Bombo Radyo Koronadal.
Suno kay Antonio, magabutang man sila sang mga police assistance desk sa mga sementeryo kag terminal agud nga mahapos nga mapalapitan sang mga pumuluyo nga nagakinahanglan sang bulig.
Magluwas sini, may igadeploy man nga kapulisan sa mga matawo nga lugar agud masiguro ang kalinong kag katawhayan.
Samtang, liwat man nga nagpahanumdom ang opisyal sa mga pumuluyo nga magakadto sa sementeryo nga indi magdala sang patalom, makahulubog nga ilimnon, magahod nga sound system ukon speaker kag iban pa.
Naga panawagan man ini nga maging vigilante kag maging responsable nga pumuluyo sa pagbisita sa mga sementeryo humalin Oktubre 31 tubtob Nobyembre 2.
