Naga-apelar si United Nations Relief and Works Agency (UNRWA) chief Philippe Lazzarini sa pungsod Israel nga temporaryo nga untaton ang pagbomba sa amihan sang Gaza agud makasulod ang humanitarian aid para sa mga naipit nga mga sibilyan.
Sandig sa report, ginabalabagan sang militar sang Israel nga makasulod sa Gaza ang dala nga bulig kag pagkaon para sa mga pumuluyo sang Gaza nga naipit na sa inaway sang tunga sang Israel kag grupo nga Hamas
Nahibaluan nga sumugod Oktubre 7, 2023 tubtob sa subong nga panahon, nagdangat na sa 42,718 ka mga Palestinians ang napatay kag 100,282 ang napilasan. Samtang 1,139 naman ang napatay sa Israel sang ginsalakay ini sang Hamas kag 200 ang ginbihag sang Oktubre 7, 2023.
Padayon naman nga nagasaka ang numero sang mga napatay nga Palestinians tagsa ka adlaw bangud sa wala untat nga pag atake sang Israel sa mga lugar nga ginapatihan sang mga ini nga ginahukmongan sang Hamas.
