Ginklaro sang Department of Trade and Industry (DTI) nga wala pa ini naka-desisyon sa mga petisyon nga ginduso para nga pasakaan ang presyo sang basic commodities.
Suno kay acting Trade Secretary Cristina Roque, magapatigayon pa ang ahensya sang konsultasyon kaangot sa request sang 60 ka stockkeeping units (SKU) nga nagalakip sang tinapay, canned sardines, detergent, canned meat, gatas, kag noodles.
Ginsaad sa petisyon nga nagamahal naman ang ila ginagamit nga ingredients bangud sa pagsaka man sa cost of living, gani kinahanglan nila nga magpasaka sa presyo para may ipang-sweldo man sa ila nga mga tawo.
Lakip man sa ginrason sa petition amo ang paghina sang balor sang Philippine peso batok sa US dollar sa nagligad nga mga binulan.
Sa pihak sini nga mga rason, gin-athag sang DTI nga ginakonsiderar man sini ang mangin epekto sa mga konsumidor kun ipatuman ang price hike sa nagapanguna nga mga kinahanglanon.
Sa mga lugar naman nga ginapaidalom sa state of calamity, may yara sang price freeze nga gina-implementar kag istrikto man nga gina-monitor sang Fair Trade Group kun gina-sunod ini sang mga manugbaligya.
