Nagpaandam si Russian President Vladimir Putin nga makabig nga isa ka ‘act of war’ kun kakason sang North Atlantic Treaty Organization (NATO) ang restriction sa paggamit sang Ukraine sang long-range Western missiles para atakehon ang Russia.
Suno sa Russian President, nagakahulugan ini nga ang NATO nga ginalakipan sang US kag European countries ang nagapakig-away sa Russia.
Suno pa kay Putin, kun ini ang matabo, magahimo ang Moscow sang desisyon bilang sabat sa mga paandam batuk sa ila.
Ginhimo sang Russian President ang nasambit nga pahayag kasunod sa kaangay nga pagbukas sang US kag NATO allied countries sa posibilidad nga pahanugutan ang Ukrainian forces nga maggamit sang long-range weapons systems para atakehon ang militar sang Russia sa Tunga sang nagapadayon nga giyera sa tunga sang Russia kag Ukraine nga nag-umpisa pa halin 2022.
