Ginaduso nga pasangkaron pa ang produksyon sang isda kag manok sa pungsod bangud sa risgo nga dala sang liwat nga pagbalik sang African Swine Fever (ASF) outbreak.
Suno sa Philippine Rural Reconstruction Movement (PRRM), mabutang sa alang-alang ang food security sang Pilipinas ilabi na bangud 450 na ka mga barangay ang may aktibo liwat nga kaso sang amo nga balatian sa baboy.
Suno kay PRRM president Edicio dela Torre, dapat nga magsaka ang produksyon sang iban nga protein sources para malab-ot gihapon ang demand sa palaabuton nga holiday season.
Sa subong, mas daku ang inventory sang imported dressed chicken sa cold storage facilities ipaanggid sa local produce.
Sandig sa data sang National Meat Inspection Service (NMIS), ang inventory ang nagdangat sa 31,917 metric tons sang nagligad nga semana kun sa diin 68% ang imported kag 10,315 MT naman ang locally produced.
Kadam-an sa imported dressed chicken ang yara sa Calabarzon, Central Luzon kag Metro Manila.
Bangud sini suno sa grupo, dapat man nga buhinan na ang importasyon kag magtutok na lang sa local production.
Ginalauman nga magadangat ang total chicken production sa 2.26 million metric tons sa yearend, apang 1.68 million MT lamang ang demand kag ginapanan-aw nga ang ending stock ang magatupa sa 780,000 MT.
Nahibaluan nga sa bahin sang hog industry, ginhingyo sang hograisers groups sa Department of Agriculture (DA) nga dasig-dasigon man ang vaccination sa mga baboy para mapunggan ang dugang nga kapierdehan sa swine industry kag indi man tuman nga maapektuhan liwat ang local pork production kag ang supply.
