Isa ka Mexican family ang gintawag nga scammers matapos nadakpan sa video nga nagabutang sang tanga sa ila mga pinggan sa isa ka restaurant agud nga makareklamo sila kag indi makabayad sa bill.
Sa social media, ginpakigbahin sang isa ka restaurant sa Guadalajara, Mexico ang pamilya sang scammers. Suno sa restaurant, ginpahog sila sang scammers nga mahimo ang mga ini sang scenario bangud sa tanga nga gina-alegar nila nakit-an sa pagkaon nga ila gin-order kun indi magpasugot ang resto nga indi nila pagpabayran ang ila gin-order.
Apisar nga natingala ang restaurant nga kilala nga may istrikto nga hygiene policy, nagdesisyon ang management nga ihatag ang demand sang mga ini agud nga malikawan ang iskandalo.
Sa video, makit-an nga hungod nga ginbutang sang babayi ang tanga sa iya pinggan kag gintawag ang waiter. Gin-akigan pa niya ini. Naglakat sila nga dala ang iban pa nga pagkaon kag wala nagbayad.
Sang naglapta na ang video, natukiban nga madamo na gali nga restaurant ang na-scam sang pamilya.
