KORONADAL CITY – Gin-aresto sang kapulisan ang isa ka hubog nga lalaki nga nagpanaya sang armas sa isa ka beer house sa Arellano corner Osmeña St., Brgy. Zone 2, Koronadal City kaagahon sang Sabado, August 10, 2024.
Ginkilala ni PLt.Col. Hoover Antonio, hepe sang Koronadal City PNP ang suspek nga si Nenio Diaz Jalandoon, 25 anyos, cook kag residente sang Prk. Upper Godwino, Brgy. Canajay, Surallah, South Cotabato.
Sandig sa imbestigasyon sang kapulisan, naghingyo sang bulig ang tag-iya sang establisyemento matapos nga nangihi ang suspek sa pirtahan sang beerhouse bangud sa kahulugbon kag sang ginsabay nagpanaya pa sang armas.
Gilayon naman nga nagresponde ang kapulisan kag gin-aresto ang suspek kun diin ginsungka man sini ang iya dala nga 9mm break open pistol nga may isa ka bala.
Natalana naman nga pasakaan sang nagakaigo nga kaso ang suspek.
