Nagpatunga na ang mga otoridad sa magtimbang nga grupo sang mga Moro Islamic Liberation Front (MILF) sa Sitio Mapayag, Barangay Tugal sakop sang Special Geographic Region sang Bangsa Moro Autonomous Region in Muslim Mindanao (BARMM) nga nag kinagamo kag nagka engkwentro nga nagresulta sang pagbakwit sang mga sibilyan sa lugar.
Ini ang nangin pahayag ni LtCol. Roden Orbon, Spokesperson sang 6ID PA sa interview sang Bombo Radyo Koronadal.
Suno sa iya, nagbaslanay sang lupok ang duha ka grupo sang Moro Islamic Liberation Front (MILF) sa Sitio Mapayag, Barangay Tugal sakop sang Special Geographic Region sang Bangsa Moro Autonomous Region in Muslim Mindanao (BARMM) bangud sa madugay na nga conflikto ukon rido.
Suno sa mga otoridad, ang duha ka grupo nga nagkaengkwentro amo ang grupo ni Nasser Dagandang sang 105th Base Command kag grupo ni Dex Sumlay sang MILF National Guard.
Sa karon, indi pa matumod ang kun ano gid ang ginhalinan sang away sang duha ka grupo.
Kadungan sini, bangud sa engkwentro nagbakwit ang masobra 500 ka pamilya gikan sa mga Sitio Mapayag, Tuway, Bulod, Narra, Labo kag Basak sang Tugal mangin sa boundary sang Sitio Libal at Sitio Drayal sang Barangay Nabalawag.
Nagbakwit ang mga ini bangud sa kahadlok nga madalahig sa engkwentro kag maigo sang bala.
Sa subong nagapabilin sa Barangay Hall sang Tugal, mga eskwelahan sang Nabalawag, Tugal Madrasa kag sa mga himata nila ang mga pamilya nga nagbakwit.
Ginahingyo naman sang mga ini nga mauntat na ang tensiyon agud nga makabalik sila sa ila tagsa ka mga puluy-an./
