Nagpaguwa na ang Armed Forces of the Philippines (AFP) angot sa mas agresibo nga pagpangharass sang China sa mga tinawo sang Philippine Navy sa kasagsagan sang resupply mission sang nagligad nga adlaw sa Ayungin shoal.
Ini matapos nga ginbuyagyag ni AFP chief General Romeo Brawner Jr. sa pagbisita niya sa Puerto Princesa, Palawan nga nakigbato ang mga tinawo sang PH Navy gamit ang ila nga kamot lamang batuk sa China Coast Guard personnel nga armado sang patalom sang ginbungguan kag nagsakay pa sa magagmay nga bangka sang Pilipinas.
Sa pihak sang presensiya sang mga armas sa sulod sang resupply boat sang PH Navy wala gingamit ang mga ini bangud nagalikaw sa giyera.
Sa baylo, gintulod sang Navy personnel ang rigid hull inflatable boats sang China Coast Guard para mapunggan nga mabungguan sang mga ini ang PH boats.
Samatang, ginkumpirmar naman ni AFP Western Command chief Rear Admiral Alfonso Torres Jr. nga ginbuslutan sang China Coast Guard personnel ang inflatable boats sang PH Navy gamit ang ila nga mga patalom.
Ginkumpirmar man ni Torres nga ginkumpiskar sang CCG ang 7 firearms apang yara sa sulod lamang ini sang kaha sang armas kag wala gingamit san mga Pilipino sa kasagsagan sang resupply mission.
Ginhimo sang AFP officials ang pagpaathag kasunod sang mga pagbunggo, pagbutong kag pagpasaka sang CCG personnel sa magamay nga bangka sang PH nga nagresulta sa pagkapilas sang 8 tinawo sang PH Navy lakip na ang isa nga nautdan pa sang tudlo insidente.
Ang nangin aksiyon sang CCG personnel ang control measures sandig sa ila nga ginainsister nga soberaniya sa halos bug-os nga undisputed waters nga nagasakop sa West Philippine Sea nga yara sa sulod sang exclusive economic zone sang Pilipinas.
