KORONADAL CITY – Dako ang pagpati sang Barangay Kapitan sang Brgy. Poblacion, Tantangan South Cotabato nga mistaken identity ang natabo nga pagpangluthang-patay sa isa ka manugbaligya sang tinapay sa Purok Maharlika, Brgy.Poblacion.
Ini ang ginpahayag ni Kapitan Jimmy Juaneza, sang Brgy. Poblacion, Tantangan South Cotabato, sa interbyu sang Bombo Radyo Koronadal.
Ginkilala ang napatay nga si Brene Oremo Baladjay, 27 years old, may ka live-in partner kag isa ka bata, nagabaligya sang tinapay kag residente sang Prk. Masagana, Brgy New Lambunao, Tantangan South Cotabato.
Suno kay Juaneza, ginahibalo man kun nasal-an nga asset sang kapulisan sa paghibalo sa kalakaran sang ilegal nga droga sa lugar ang biktima.
Kaangot sini, nagapanawagan si Kapitan Juaneza kun sin-o man ang nakabalo sang matuod nga panghilitabo, mahimo nga makig-angot sa ila nga talatapan agud nga maangkon man sang pamilya ang hustisya.
Samtang, sandig naman sa utod sang biktima wala man ini sang nakaaway.
Isa lamang suno pa ang ila nahibaluan nga may nagadumot diri nga isa ka persona bangud sa wala sini mabayaran nga utang nga nagakantidad sang Php115 bangud sa ginbakal sini nga “igi”.
Apang indi man matumod sang utod sini kun may kaangtanan man ang ini nga utang sa natabo sa biktima.
Sa karon, nagahingyo sang bulig ang pamilya nga mahatagan sang hustisya ang kamatayon sang biktima.
